Табиғат адам өмірінің маңызды бөлігі ғана емес, сонымен қатар оның күнделікті тіршілігін қамтамасыз ететін түрлі байлықтарға да ие. Осы байлықтардың бірі — ағын су арналары, каналдар мен арық-атыздар. Бұл су жүйелері ауыл шаруашылығының дамуына, экологиялық тепе-теңдіктің сақталуына және адамдардың тіршілігіне қажетті маңызды ресурстарды жеткізуге қызмет етеді. Сондықтан, оларды таза ұстау тек экологиялық тұрғыдан ғана емес, әлеуметтік және экономикалық тұрғыдан да аса маңызды.
Мемлекет басшысының бастамасымен республика бойынша «Таза Қазақстан» экологиялық мәдениетті дамытудың 2024-2029 жылдарға арналған тұжырымдамасын іске асыру аясында аудан аумағында сенбілік жұмыстары жалғасуда. Облыс әкімі Н.Көшеровтың бекіткен іс-шара жоспарына сәйкес, «Мөлдір бұлақ» акциясы аясында бүгін Мақтаарал ауданында канал жағалаулары мен арық-атыздардың бойына тазалық жұмыстары жүргізілді.
«Мақтаарал ауданында ауыл шаруашылығы үшін ағын су арналары мен арық-атыздардың маңызы зор. Олар егістіктерді суару, мал шаруашылығының қажеттіліктерін қамтамасыз ету, сондай-ақ табиғи су көздеріне бағыт беру үшін маңызды қызмет атқарады. Әрбір адам осы мәселеге жауапкершілікпен қарауы тиіс. Жергілікті тұрғындар табиғатқа деген қамқорлықты сезіне отырып, ауыз су көздерін қорғау үшін түрлі экологиялық шараларға белсене қатысуға шақырамыз. Әрбір адам өз үйінің, өз ауылының, өз өлкесінің табиғатын қорғауға жауапты. Адамзат табиғаттың бір бөлшегі екендігін ұмытпай, оны таза ұстауға үлес қосуы керек» — деді, акцияны ұйымдастырушылар.
Жалпы сенбілік жұмыстарына 1120 адам атсалысып, 11 дана техника тартылды. 12 шақырымнан аса ағын су арналары, арық-атыздар мен ирригациялық жүйелер тазаланып, 25 тонна қоқыс шығарылды.
Айта кетейік, қазіргі таңда тазалық мәселесі елімізде өте өзекті. Осыған байланысты ауданымызда тазалықты сақтамаған тұрғындарға айппұлдар салу бойынша нақты шаралар қолға алынуда. Мәселен, «Таза Қазақстан» экологиялық акциясы басталғалы Қазақстан Республикасының Әкімшілік құқық бұзушылықтар туралы кодексінің 434-бабының 2-тармағы бойынша 286 шара көріліп, 7,5 миллион теңге айыппұл салынған. Оның 3,7 миллион теңгесі өндірілді.
