Жазғы демалыс кезінде балалардың көпшілігі сауықтыру лагерлерінде уақыт өткізіп, таза ауада демалып, түрлі іс-шараларға қатысады. Бұл кезең балалардың денсаулығын нығайтуға мүмкіндік бергенімен, жаздың ыстық ауа райында тамақтан улану қаупі де арта түседі. Балалардың иммундық жүйесі толық қалыптаспағандықтан, олар сапасыз немесе дұрыс сақталмаған тағамнан ересектерге қарағанда жиі және ауыр улануы мүмкін. Сондықтан жазғы лагерлерде тағам қауіпсіздігін қамтамасыз ету – балалардың денсаулығын сақтаудың басты шарттарының бірі.

Тамақтан улану – бактериялармен, вирустармен немесе олардың токсиндерімен ластанған тағамды немесе суды пайдаланудан болатын жедел ауру. Оның негізгі белгілеріне жүрек айну, құсу, іштің ауыруы, іш өту, дене қызуының көтерілуі және жалпы әлсіздік жатады. Мұндай жағдайлар балалар ағзасында сұйықтықтың тез жоғалуына әкеліп, ауыр асқынулар туындатуы мүмкін.

Жазғы лагерлерде тамақтан уланудың алдын алудың ең маңызды жолы – санитариялық-гигиеналық талаптарды қатаң сақтау. Асхана қызметкерлері жеке бас гигиенасын сақтап, жұмысқа тек міндетті медициналық тексеруден өткеннен кейін ғана жіберілуі тиіс. Тағам дайындау барысында қолды мұқият жуу, арнайы жұмыс киімін пайдалану және ас үй құралдарының тазалығын сақтау міндетті талаптардың бірі болып табылады.

Балаларға ұсынылатын тағам міндетті түрде жаңа дайындалған, сапалы және қауіпсіз болуы қажет. Ет, құс еті, балық, жұмыртқа және сүт өнімдері толық термиялық өңдеуден өтуі тиіс. Дайын тағамдарды бөлме температурасында ұзақ уақыт сақтауға болмайды. Тез бұзылатын тағамдар тоңазытқышта тиісті температурада сақталуы керек, ал жарамдылық мерзімі өткен немесе сыртқы түрі өзгерген өнімдерді пайдалануға қатаң тыйым салынады.

Балалардың жеке бас гигиенасына да ерекше көңіл бөлінуі қажет. Тамақ ішер алдында және дәретханадан кейін қолды сабынмен жуу – тамақ арқылы жұғатын көптеген инфекциялардың алдын алатын қарапайым әрі тиімді шара. Сонымен қатар балаларға жуылмаған жемістер мен көкөністерді жемеу, белгісіз көздерден су ішпеу және лагерь аумағынан тыс жерлерден сатылатын тағамдарды сатып алмау қажеттігі түсіндірілуі тиіс.

Жаз мезгілінде ауыз су сапасын бақылау да аса маңызды. Лагерьде тек қауіпсіз, санитариялық талаптарға сәйкес келетін ауыз су пайдаланылуы керек. Балаларға қайнатылған немесе бөтелкедегі суды ішу ұсынылады.

Егер балада жүрек айну, құсу, іштің ауыруы, іш өту немесе дене қызуының көтерілуі байқалса, оны дереу медициналық қызметкерге көрсету қажет. Мұндай жағдайда баланы өздігінен емдеуге болмайды. Уақытылы көрсетілген медициналық көмек аурудың асқынуының алдын алуға мүмкіндік береді.

Балалардың денсаулығы – қоғамның басты байлығы. Жазғы лагерлерде санитариялық талаптарды сақтау, қауіпсіз тағаммен қамтамасыз ету, таза ауыз суды пайдалану және жеке бас гигиенасын сақтау арқылы тамақтан уланудың алдын алуға болады. Балалардың қауіпсіз әрі дені сау демалысын ұйымдастыру – лагерь қызметкерлерінің, медицина мамандарының және ата-аналардың ортақ жауапкершілігі.

Түркістан облысының санитариялық-эпидемиологиялық бақылау департаменті басшысының орынбасары А.Искаков