Ұрпақ тәрбиесі – мемлекет дамуының негізгі алғы шарты. Бұған барлығымыз жауаптымыз. Расында, тәрбиелі бала елдің болашақ тірегі екені даусыз. Осыған байланысты күні кеше Мақтаарал ауданында «Қоғамға қауіпті бес кесел» атты аудандық ата-аналар форумы өтті.
Форумның мақсаты — баланың кемел адам болып қалыптасуына ата-ананың рөлін айқындау, оның болашағының жарқын болуына ұлағатты ұстаздардың, қоғамның үлесін арттыру, жалпы оқушыларға сапалы біліммен қатар, саналы тәрбие берудегі мәселелердің шешімін табу.
Іс-шараға қоғам қайраткері Оразкүл Асанғазықызы, «Отбасы институтын дамыту» қоғамдық бірлестігінің төрағасы, психолог, педагог-тренер Нұржан Сапарханұлы, аудан әкімінің орынбасары Серік Тұрсынқұлов, аудандық мәслихат хатшысы Қадыр Сәрсекбаев, ауданның прокуроры Айтболат Досаев, ішкі істер бөлімінің бастығы Ердаулет Амантаев, ауданның ардагер ұстаздары, мектеп директорлары мен директордың тәрбие ісі жөніндегі орынбасарлары, педагог-психологтар, ата-аналар және бұқаралық ақпарат құралдарының өкілдері қатысты.
«Бала тәрбиесі – ортақ мүдде. Ата-ана, мектеп, оқушы үштігі тығыз қатынаста жұмыс істесе, көп жетістікке жетеріміз сөзсіз. Себебі, балаларымыздың, оқушылардың білімі мен тәрбиесі ересектердің басты міндет-мақсаты саналады. Балалардың тәрбиесін бір ғана мектеп пен мұғалімге жүктеп қойғанымыз дұрыс емес. Екі жақты байланыс нығайғанда ғана барлық күрделі мәселелердің түйіні шешіледі деп ойлаймыз. Сондықтан, бүгінгі форумда еркін түрде пікір алысатын боламыз» — деді, модератор С.Тұрсынқұлов.
Форум барысында Оразкүл Асанғазықызы «Отбасы құндылықтары және ұлттық тәрбие» тақырыбында сөз қозғады. «Отбасы институтын дамыту» қоғамдық бірлестігінің төрағасы, психолог, педагог-тренер Нұржан Сапарханұлы «Өркениетті қоғам отбасыдан басталады» атты еркін тақырыпта өзінің ойларымен бөлісті. Сонымен қатар, ауданның құрметті азаматы Құнанбай Мұсаев бала тәрбиелеудегі өз тәжірибелерін ортаға салды. Ал, аудандық аналар кеңесінің төрайымы Сәулеш Сламбекова «Бала мен ата-ана арасындағы алтын көпір» тақырыбында баяндама жасады.
Қоғамда орын алып жатқан бала тәрбиесіндегі ең өзекті мәселелердің барлығы да жиында айтылды. Бала тәрибесінде қоғам болып бірлесе атсалысып, әрекет ету арқылы ғана белгілі бір жетістікке жетуге болатыны сөз болды. Ұжым болып дайындайтын болсақ, біздің балаларымыз міндетті түрде Қазақстанның болашағын өркендететін, Отанына адал, білімді ұрпақ болатыны сөзсіз деген модератор жиынды қорытындылады.
