Адам папилломавирусы (АПВ) – әлемде кең таралған вирустардың бірі. Оның кейбір түрлері адам ағзасында ұзақ уақыт сақталып, әртүрлі аурулардың дамуына, соның ішінде жатыр мойны обырының және басқа да қатерлі ісік түрлерінің пайда болуына себеп болуы мүмкін. АПВ инфекциясының алдын алудың ең тиімді жолдарының бірі – вакцинация. АПВ-ға қарсы вакцина көптеген елдерде қолданылып келеді және оның қауіпсіздігі мен тиімділігі ғылыми зерттеулер арқылы дәлелденген.
АПВ негізінен жыныстық жолмен тарайтын инфекция болғанымен, вирус жұқтырған адамның көбінде ешқандай белгі байқалмауы мүмкін. Уақыт өте келе кейбір жоғары қауіпті АПВ түрлері жасушалардың өзгеруіне әкеліп, қатерлі ісікке дейінгі жағдайлардың дамуына себеп болуы ықтимал. Сондықтан вакцинацияны вирусты жұқтырмай тұрып жүргізу оның алдын алуда ең жоғары нәтиже береді. Дәрігерлер АПВ-ға қарсы екпені көбіне жасөспірімдерге ұсынады, себебі бұл кезеңде ағзада күшті иммундық жауап қалыптасады.
АПВ-ға қарсы вакцинаның қауіпсіздігі көптеген жылдар бойы зерттеліп келеді. Вакцина құрамында тірі вирус болмайды, сондықтан ол АПВ инфекциясын тудыра алмайды. Оның құрамындағы бөлшектер ағзаға вирусты тануды үйретіп, иммундық жүйенің қорғаныс қалыптастыруына көмектеседі. Вакцина әлемнің көптеген елдерінде миллиондаған адамға салынған және қауіпсіздігі тұрақты бақылауда.
Көп жағдайда вакцинадан кейінгі әсерлер жеңіл және қысқа мерзімді болады. Екпе салынған жерде ауырсыну, қызару немесе ісіну, сондай-ақ аздап дене қызуының көтерілуі, шаршау, бас ауруы сияқты белгілер байқалуы мүмкін. Бұл белгілер ағзаның иммундық жауап қалыптастырып жатқанын көрсетеді және әдетте бірнеше күн ішінде өздігінен басылады. Кез келген медициналық препарат сияқты вакцинадан кейін сирек жағдайда аллергиялық реакциялар болуы мүмкін, сондықтан екпені медицина мамандарының бақылауымен алған дұрыс.
АПВ-ға қарсы вакцинаның тиімділігі де жоғары. Зерттеулер көрсеткендей, вакцина құрамына кіретін АПВ түрлерінен болатын инфекциялардың алдын алуда және соларға байланысты қатерлі ісік алды өзгерістердің даму қаупін төмендетуде вакцина маңызды рөл атқарады. Әсіресе вакцинация толық жүргізілген жағдайда қорғаныс деңгейі жоғары болады.
АПВ вакцинасы тек жеке адамды ғана емес, жалпы қоғамды қорғауға ықпал етеді. Вакцина алған адамдар саны көбейген сайын вирустың таралуы азайып, инфекцияға байланысты аурулардың жиілігі төмендейді. Бұл болашақта жатыр мойны обыры және АПВ-мен байланысты басқа да аурулардың алдын алуға мүмкіндік береді.
АПВ-ға қарсы вакцинация – денсаулықты қорғаудың заманауи және ғылыми негізделген әдісі. Оның қауіпсіздігі қатаң бақылаудан өткен, ал тиімділігі көптеген зерттеулермен расталған. Вакцинация туралы дұрыс ақпарат алу, дәрігермен кеңесу және ұсынылған екпе күнтізбесін сақтау арқылы АПВ инфекциясының және оның қауіпті салдарының алдын алуға болады. Денсаулықты қорғау – ауруды емдеуден бұрын оның алдын алудан басталады.
Түркістан облысының санитариялық-эпидемиологиялық бақылау департаменті басшысы Н.Нышанов
