Өздеріңізге белгілі, медициналық көмек көрсетумен байланысты инфекциялар бүкіл әлемдегі денсаулық сақтаудың маңызды мәселелерінің бірі болып саналады. Бұл инфекциялар аурулардың асқынуына, науқастардың жағдайының нашарлауына, ұзақ уақыт емделуге, әрі медициналық шығындардың өсуіне әкелуі мүмкін.
Инфекциялар аурухана жағдайында қолданылатын медициналық құралдар, құрал-жабдықтар, персонал немесе басқа пациенттер арқылы таралады. АІИ түрлері:
• Хирургиялық араласу саласындағы инфекциялар;
• Қан ағысы жолдарының (қан арнасының) бастапқы инфекциялары;
• Ауруханаішілік пневмония;
• Несеп шығару жолдарының инфекциялары;
• Буын және сүйек инфекциялары;
• Төменгі тыныс алу жолдары инфекциялары
Медициналық көмек көрсетумен байланысты инфекциялардың алдын алу шаралары:
1. Гигиеналық талаптардың қатаң сақталуы:
• Қолды жуу: Медициналық қызметкерлер мен пациенттер үшін қолды жуу және антисептиктерді қолдану аса маңызды. Қолды жиі және дұрыс жуу инфекциялардың алдын алудың негізгі шарасы болып табылады.
• Жеке қорғаныс құралдарын қолдану: Хирургиялық қолғап, бетперде, көзілдірік және халаттарды пайдалану инфекциялардың берілуін шектеуге көмектеседі.
2. Медициналық құралдардың стерильденуі:
• Барлық медициналық құралдар мен жабдықтарды дұрыс стерильдеу және дезинфекциялау — инфекциялардың таралуын болдырмау үшін маңызды. Операциялық құралдар мен инелерді әр науқас үшін жеке пайдалану қажет.
• Құралдардың стерильдігін тексеру, сондай-ақ бір рет қолданылатын құралдарды пайдалану — инфекцияның алдын алу үшін қажет шаралар.
3. Пациенттерді оқшаулау:
• Инфекциялық аурулары бар пациенттерді басқа науқастардан бөлек орналастыру маңызды. Бұл аурулардың таралуын шектеуге көмектеседі. Мысалы, туберкулез, тұмау немесе басқа жұқпалы аурулары бар науқастардың жеке палатада болуы қажет.
4. Қауіпсіздік және санитарлық-гигиеналық стандарттарды сақтау:
• Медициналық мекемелерде санитарлық-гигиеналық стандарттарды сақтау өте маңызды. Бұл ғимараттардың тазалығы, ауа айналымы, құрал-жабдықтардың стерильдігі мен қауіпсіздікті бақылау шараларын қамтиды.
5. Медициналық қызметкерлердің денсаулығын бақылау:
• Медициналық қызметкерлердің денсаулығын бақылап, оларды уақытында тексеруден өткізу инфекциялардың алдын алудың маңызды бөлігі болып табылады. Олар инфекцияның белгілері пайда болған жағдайда жұмысқа шықпауы тиіс.
Медициналық көмек көрсетумен байланысты инфекциялардың таралуын алдын алу үшін гигиеналық талаптарды сақтау, медициналық құралдарды дұрыс өңдеу, пациенттерді оқшаулау сияқты шараларды қатаң ұстану қажет. Инфекциялардың таралуы медициналық қызметкерлердің кәсіби жауапкершілігін, сондай-ақ барлық адамдардың белсенді қатысуын талап етеді. Тек осындай кешенді шаралар медициналық көмек көрсету орталарында инфекциялардың таралуын шектеуге мүмкіндік береді.
Түркістан облысының санитариялық-эпидемиологиялық бақылау департаменті басшысы Н.Нышанов
