Мақтаарал ауданы – көрші Өзбекстанмен шекаралас жатқан аймақ. «Атамекен» кедендік бекеті және «Сырдария», «Целинный» шекара өткізу пункттері арқылы көрші елден қонақтарымыз ағыл-тегіл келіп, еліміздің түкпір-түкпірінен қоңсы жатқан елге сапарлап баратын қаншама отандастарымыз бар. Оның барлығы да біздің ауданымыздың территориясынан өтеді, біздің туған жерімізге сын көзбен қарайды. Сондықтан, туған өңіріміздің келбеті, абаттануы, тазалық мәселесі ерекше маңызға ие.
«Таза Қазақстан» республикалық акциясы аясында Мақтаарал ауданында бүгін сенбілік жұмыстары жалғасып, 4 мың дана ағаш көшеттері отырғызылды. Аудан әкімі Бақыт Асанов бастаған іс-шараға барлық қоғамдық ұйымдардың басшылары мен мүшелері, мемлекеттік мекемелердің, кәсіпкерлік нысандардың ұжымдары және аудан тұрғындары қатысты.
Іс-шара барысында аудан басшысы, мәслихат депутаттары, спортшылар, мәдениет майталмандары және кәсіпкерлер тұрғындарды тазалыққа, қоршаған ортамызды көгалдандыруға шақырып, үндеу жолдады.
«Біздің ауданымыздың көркеюі, экологиялық жағдайының жақсаруы баршамыздың ортақ күш-жігерімізге байланысты. Аудан аумағының тазалығы мен көркейту жұмыстары — бұл тек мемлекеттік қызметшілер мен коммуналдық мекемелердің ғана емес, әрбір тұрғынның жеке міндеті. Мен сіздерді қоршаған ортамызға, табиғатқа жауапкершілікпен қарауға, қоқыстарды орындарына тастауға және уақытылы шығаруға, көшелер мен саябақтарды таза ұстауға, шарбақтарыңызды жаңалап, тал егіп, айналамызды көгалдандыруға шақырамын!» — деді, Бақыт Насырханұлы.
Сенбілік барысында көшет отырғызудан бөлек, ауданымыздың кіре беріс аймағын, республикалық, облыстық маңызы бар автожолдардың бойлары мен елдімекендердің орталық көшелері, әлеуметтік нысандардың айналасы, арық-атыздар мен аяқ жолдар, саябақтар мен гүлзарлар күл-қоқыстан тазаланып, тазалық жанашырлары ортақ мекеніміздің көркеюіне өз үлестерін қосты. Аудан басшысының өзі сенбілік барысын арнайы қадағалап, тазалық және көшет отырғызу шарасына тұрғындарды жаппай тарту керектігін атап өтті.
Айта кетейік, жалпы іс-шараға 9 дана техника бірлігі мен 3 мыңнан аса адам қатысты. 32 тоннадан астам күл-қоқыс шығарылып, бұл қоқыстар аудан аумағындағы қатты тұрмыстық қалдықтарға арналған полигонға төгілді.
