Адам денсаулығы — баға жетпес байлық. Ал сол байлықтың негізі — дұрыс және теңгерімді тамақтануда жатыр. Қандай да бір аурудың алдын алу, көңіл-күйді жақсарту, күнделікті белсенділікті сақтау — бәрі тамақтану мәдениетіне тікелей байланысты. Сол себепті дұрыс тамақтану – әрбір адамның өмір салтына айналуы тиіс басты қағида.
Дұрыс тамақтану деген не?
Дұрыс тамақтану — ағзаға қажетті барлық қоректік заттарды (ақуыз, май, көмірсу, дәрумендер мен минералдар) жеткілікті мөлшерде қабылдау. Бұл — тек белгілі бір тағам түрінен бас тарту немесе арықтау үшін қолданылатын уақытша диета емес, бұл – күнделікті өмір салты. Ағза барлық мүшелер мен жүйелердің дұрыс жұмыс істеуі үшін сапалы әрі пайдалы тағамдарды қажет етеді.
Дұрыс тамақтанудың маңызы
- Аурудың алдын алады
Дұрыс тамақтану жүрек-қан тамырлары аурулары, семіздік, қант диабеті, асқазан-ішек жолдарының бұзылыстары және басқа да созылмалы дерттердің даму қаупін төмендетеді. - Иммунитетті нығайтады
А, С, D дәрумендеріне, темір мен мырышқа бай тағамдар иммундық жүйені күшейтіп, ағзаны түрлі инфекциялардан қорғайды. - Энергия көзі болады
Күні бойы сергек жүру, сабаққа немесе жұмысқа зейін қою үшін ағзаға пайдалы энергия қажет. Ал ол — дұрыс, уақтылы және құнарлы тағамнан алынады. - Психикалық денсаулықты жақсартады
Зерттеулерге сүйенсек, теңгерімді тамақтанатын адамдардың күйзеліске ұшырау деңгейі төмен болады. Омега-3 май қышқылдары, В дәрумендері көңіл-күйге оң әсер етеді.
Дұрыс тамақтану ережелері
- Тағамды күніне 4-5 рет, белгілі бір уақытта қабылдау;
- Таңғы асты міндетті түрде ішу;
- Көкөніс пен жемісті күнделікті тұтыну;
- Қуырылған, тұзды, тәтті және фастфуд өнімдерін шектеу;
- Газды, тәтті сусындардан бас тарту;
- Күніне кемінде 1,5–2 литр таза су ішу;
- Түнде тамақ ішпеу, кешкі асты ұйықтардан 2-3 сағат бұрын ішу.
Қорытынды
Дұрыс тамақтану — өзіңе деген қамқорлықтың көрінісі. Тамақ – тек қарын тойғызу құралы емес, ол — денсаулықтың тірегі, өмірдің қуаты. Әр адам өзінің және отбасының саулығын сақтау үшін дұрыс тамақтану мәдениетін қалыптастыруы қажет. Себебі, біз не жесек, соған айналамыз. Бүгінгі таңдаулы таңдау — болашақтағы жарқын өмірдің кепілі.
Түркістан облысының санитариялық-эпидемиологиялық бақылау департаменті басшысының орынбасары А.Искаков
