Мақтаарал ауданында әлеуметтік қолдау жүйесін цифрландыруға арналған ауқымды оқыту семинары өтті. Іс-шараның негізгі мақсаты — азаматтарға көрсетілетін мемлекеттік қолдау қызметтерін заманауи цифрлық форматқа көшіру арқылы олардың тиімділігі мен қолжетімділігін арттыру.
Семинар жұмысына Қазақстан Республикасының Мәдениет және ақпарат министрлігі жанынан құрылған «Отбасын қолдау орталықтарының қызметін жетілдіру жөніндегі жобалық кеңсенің» басшысы Сағындық Фарида ханым жетекшілік еткен жобалық топ мүшелері қатысты. Аталған топ әлеуметтік қолдау шараларын цифрлық форматқа көшіру бағытындағы пилоттық жобаны жүзеге асыруда. Сонымен қатар, семинарға Түркістан облысының «Жұмыспен қамтуды үйлестіру және әлеуметтік бағдарламалар» басқармасы басшысының орынбасары К.Мирова арнайы іссапармен келіп, жұмыс барысымен танысты.
Жиынды аудан әкімінің орынбасары С. Тұрсынқұлов ашып, жүргізіп отырды. Оқыту семинарына Мақтаарал аудандық полиция бөлімінің, аудандық орталық ауруханалар мен емханалардың, білім беру ұйымдарының (мектеп директорлары мен тәрбие ісі жөніндегі орынбасарлар), әлеуметтік педагогтар, ауыл округі әкімдері мен аудандық «Отбасын қолдау орталығы» КММ мамандары белсене қатысты.
Семинар барысында ҚР Еңбек және халықты әлеуметтік қорғау министрлігінің бастамасымен енгізіліп жатқан FSM Social ақпараттық жүйесі мен Socium автоматтандырылған ақпараттық жүйесі (ААЖ) туралы кең көлемді ақпарат берілді. Бұл платформалар әлеуметтік қолдау шараларын көрсету барысында процестерді толықтай автоматтандыруға, мемлекеттік органдар мен мекемелер арасындағы ақпарат алмасуды жеделдетуге және тиімдірек етуге бағытталған.
Цифрлық жүйелердің артықшылықтары ретінде адами фактордың ықпалын азайту, шешім қабылдаудағы дәлдікті арттыру, мамандардың жұмыс жүктемесін жеңілдету және қызмет алушылардың мемлекеттік қолдау шараларына қолжетімділігін арттыру атап өтілді. Сонымен қатар, мобильді қосымшалар арқылы азаматтарға көрсетілетін қызметтердің сапасын жақсарту, өтініш беру мен құжат тапсыру рәсімдерін жеңілдету мәселелері де қозғалды.
Семинар қорытындысында қатысушылар жаңа жүйелердің артықшылықтары мен енгізу тетіктері бойынша өз пікірлерін ортаға салып, нақты ұсыныстар мен сұрақтарын қойды. Оқыту шарасы әлеуметтік саланы цифрландыру жолындағы маңызды қадам ретінде бағаланды.
