ҚР-ның «Қазақстан Республикасындағы жергілікті мемлекеттік басқару және өзін-өзі басқару туралы» Заңының 33,37-баптарына, ҚР-ның «Қазақстан Республикасының мемлекеттік қызметі туралы» Заңының 61-бабы 1-тармағының 1-1 тармақшасына және ҚР Президентінің 2015 жылғы 29 желтоқсандағы №152 Жарлығымен бекітілген «Б» корпусының бос немесе уақытша бос мемлекеттік әкімшілік лауазымдарына конкурс өткізілместен ауысу тәртібімен орналасу қағидаларының 2-тармағының 4-тармақшасына сәйкес, аудан әкімі Бақыт Асановтың өкімімен Әбенов Шалқар Еркінбайұлы Мақтаарал ауданының экономика және қаржы бөлімінің басшысы мемлекеттік әкімшілік лауазымына тағайындалды.
Бүгін аудан басшысы жаңа басшыны аудан активіне таныстырып, алдағы жұмысына сәттілік тіледі. Сондай-ақ, аудан әкімінің орынбасары Б.Шомпиев бөлімнің ұжымымен арнайы жиын өткізіп, жаңа басшының тағайындалғаны туралы хабарлады. Ол мекеменің құжаттарына, оның ішінде қаржылық құжаттарға бірінші қол қою құқығы берілгенін атап өтті.
Ш.Әбенов 1988 жылы Оңтүстік Қазақстан облысы Мақтаарал ауданында дүниеге келген. 2009 жылы Қ.А.Яссауи атындағы Халықаралық қазақ-түрік университетін «Қаржы» мамандығы бойынша аяқтаған.
Еңбек жолын 2014 жылы Мақтаарал ауданының мәдениет және тілдерді дамыту бөлімінде бас маман-есепші болып бастаған.
2016 жылы Мақтаарал ауданының ішкі саясат, мәдениет және тілдерді дамыту бөлімінде мәдениет және тілдерді дамыту секторының меңгерушісі, 2018 жылы Мақтаарал ауданының экономика және қаржы бөлімінің бас маманы қызметтерін атқарды.
2021 жылдан бастап қазіргі қызметіне тағайындалғанға дейін Мақтаарал ауданының экономика және қаржы бөлімінде бюджеттік жоспарлау және экономикалық талдау секторының меңгерушісі болып абыройлы еңбек етті.
