Сенбілік – бұл тек қана тазалық жұмыстары жүргізілетін күн емес, ол әрбір азаматтың қоғам алдындағы жауапкершілігін сезінетін, өзінің туған жеріне деген махаббатын көрсететін ерекше күн.
«Таза Қазақстан» акциясы аясында өткізілген 15 ақпан күнгі жалпы сенбілік — Мақтаарал ауданының аумағында үлкен тазалық жұмыстарының орындалуына себеп болды.
Сенбілік барысында 21 тоннадан астам күл-қоқыс шығарылып, бұл қоқыстар аудан аумағындағы қатты тұрмыстық қалдықтарға арналған полигонға төгілді. 15 шақырым автомобиль жолы мен 6 шақырым аяқжол ретке келтіріліп,14,3 шақырым арық-атыздар мен ирригациялық жүйелер тазаланды. Сонымен қатар, шараға 11 техника бірлігі мен 925 адам қатысты, олардың арасында мемлекеттік, бюджеттік мекеме қызметкерлері, еріктілер және жергілікті тұрғындар болды.
«Қоқыс тастау, экологияға зиян келтіру – бұл адамзаттың табиғатқа жасаған қиянаты. Сенбіліктер арқылы бұл мәселені шешіп, табиғатқа деген сүйіспеншілікті насихаттай аламыз. Өйткені, табиғаттың әдемілігі, оның тазалығы – барша адамзатқа ортақ байлық. Сенбілік – осы байлықты қорғау және сақтау жолындағы маңызды қадамдардың бірі» — деді, сенбілікті ұйымдастырушылар.
Бұл іс-шара аумақтың тазалығын қамтамасыз етіп, тұрғындардың экологиялық сана-сезімін арттыруға бағытталған маңызды қадам болып табылады.
