Четверг, 25 июля, 2024
25.4 C
Мырзакент
ҮйӘлеумет30 жыл бойы қараусыз қалған "М-39" халықаралық автожолының бойы тазаланды

30 жыл бойы қараусыз қалған «М-39» халықаралық автожолының бойы тазаланды

Ел Президенті Қасым-Жомарт Тоқаевтың тапсырмасымен өтіп жатқан «Таза Қазақстан» республикалық экологиялық акциясына мақтааралдықтар белсене қатысуда.

Бүгін аудан әкімі Бақыт Асановтың бастамасымен аудан көлемінде жаппай сенбілік өтіп, 30 жыл бойы қараусыз қалған М-39 «Ташкент-Термез» халықаралық автожолының бойы жабайы шөптер мен күл-қоқыстан арылды.

Мақтаарал ауданының жұртшылығы экологиялық акция аясында өтіп жатқан сенбілікті мерекелік көңіл-күймен бастап, мәдениет қызметкерлері ән-жырдан шашу шашты. Жиналған көпшіліктің алдында аудан басшысы сөз сөйлеп, экологиялық акцияның еліміз үшін маңыздылығына кеңінен тоқталды.

«Тарихы терең Мақтаарал ауданының жұртшылығы ауызбіршілігінің, ұйымшылдығының арқасында мемлекет басшысының бастамаларына үнемі қолдау көрсетіп келеді. Бұл акцияға да жерлестеріміз жаппай белсене қатысуда. Әрине, туған жеріміздің, қоршаған ортамыздың таза болып, жасыл желекке айналуы – ең алдымен халықтың игілігі. Ауданымыздың әрбір тұрғыны өз ауласынан бастап тазалық жұмыстарын жүргізсе, көшелердің, елдімекендердің тұрғындары бірігіп көшет егу жұмыстарын жасаса, әрбір азамат табиғатқа қамқорлықпен қараса – ауданымыз бұдан да көркейіп, ажарлана түсетініне сенімім мол» — деді, Бақыт Насырханұлы.

Аудан әкімі Өзбекстан мен Қазақстан Республикалары арасындағы ғасырлар бойы қалыптасқан тарихи, достық қатынастарды жандандырып, туысқан екі ел арасында алтын көпір бола білген «М-39» автожолының бойына тазалық жұмыстарын жүргізу – бұл еліміздің саясаты үшін де маңызды іс екенін түсіндірді. «Сырдария», «Целинный» шекара бекеттері мен «Сапар» базары орналасқан магистрал жолға алдағы уақытта жөндеу жұмыстары жоспарланып отырғанын да тілге тиек етті.

Іс-шараға аудан әкімі аппараты, кенттер мен ауылдық округ әкімдіктері, дербес бөлімдердің мамандары, халықты жұмыспен қамту орталығы, спорт, мәдениет мекемелерінің қызметкерлері, аудан бойынша шекара басқармасының сарбаздары және аудан тұрғындары қатысты.

Жалпы аудан бойынша сенбілік жұмыстарына 6560 адам, 26 техника қатысып, 27 тонна күл-қоқыс шығарылды. «М-39» халықаралық автожолының Мақтаарал ауданындағы ұзындығы 24 шақырымды құраса, соның тең жартысы тазаланды.

ҰҚСАС МАҚАЛАЛАР

ЖАУАП ҚАЛДЫРУ

Пікіріңізді енгізіңіз!
мұнда сіздің атыңызды енгізіңіз

ЕҢ ТАНЫМАЛ