Ауыл шаруашылығы саласындағы жұмыстардың тиімділігін арттыру, көктемгі дала жұмыстарына дайындықты күшейту және жер ресурстарын тиімді пайдалану мақсатында Мақтаарал ауданында ауыл шаруашылығы мәселелері бойынша кең көлемде жиын өтті.
Аудан әкімінің орынбасары Нұрбол Саттаровтың төрағалығымен өткен жиынға кенттер мен ауылдық округтердің әкімдері, ағын су беруші мекемелердің басшылары, жанар жағармай таратушы мекмелердің басшылары, ауыл шаруашылығы бөлімінің мамандары және шаруа қожалықтардың төрағалары қатысты.
Күн тәртібінде су үнемдеу технологияларын енгізу, «Ауыл аманаты» бағдарламасын орындау, жеңілдетілген жанар жағармай тарату, мемлекеттен ауыл шаруашылығы саласына көрсетілетін жеңілдіктер, мақта тұқымын дайындау, күріш дақылын егуді шектеу, ИДЖЖЖ-2 жобасының орындалуы, бос жатқан жерлерді игеру, ветеринариялық қызмет және 2025 жылға тартылатын инвестициялық мәселелер қаралды.
Жиында сөзге шыққан кәсіпкерлік және ауыл шаруашылығы бөлімінің басшысы Баязит Әлімқұл қазіргі таңда басты назарда тұрған тамшылатып суғару технологиясын енгізудегі мемлекет тарапынан көрсетілетін жеңілдіктер бойынша толықтай түсіндіру жұмыстарын жүргізді.
«Мемлекет тамшылатып суғару технологиясын іске асырған шаруаларға кеткен шығынның 80%-ын субсидиялап беруді қолға алғанын жақсы білесіздер. Мұндай мүмкіндікті тиімді пайдаланып қалуымыз керек. Биыл Мақтаарал ауданында 6 мың гектар алқапқа тамшылатып суғару технологиясын енгізу жоспарланып отыр. Қазірдің өзінде 500 гектардан астам егістік алқабының құжаттары ауыл шаруашылығы басқармасына жолданды. Басқа да шаруаларды жаңа технологияға көшуге шақырамын!» — деді, бөлім басшысы
Жиында көктемгі егіс науқанына дайындық барысы да пысықталды. Оның ішінде агротехникалық шараларды уақытылы жүргізу, мемлекеттен берілетін жанар жағармай мен басқа да жеңілдіктерді пайдалану, сапалы мақта тұқымын егу мәселелері сөз болды.
Н.Саттаров «Ауыл аманаты» бағдарламасы биыл қайта жанданатынын атап өтіп, шаруалар мен кәсіпкерлерге бағдарлама арқылы жаңа кәсіпорындар ашып, шағын және орта кәсіпкерлікті дамытуға үлес қосуға шақырды. Сонымен қатар, күріш дақылын егуге ниетті шаруалар тізімін нақтылау – күріш егушілердің қатары мен дайындықтары туралы, ағын судың жетіспеушілігіне байланысты күріш дақылын барынша азайту мәселелері де қаралды.
Айта кетейік, игерілмей жатқан ауыл шаруашылшығы жерлерін мемлекетке қайтару, мал шаруашылығын дамыту бойынша мал ауруларының алдын алуда ветеринариялық қызметтің жұмысын күшейту тақырыптары да жиында қозғалды. Шаруалар мен тұрғындар тарапынан сұрақтар қойылып, қанағаттанарлық жауаптар берілді.
