Қазақстан Республикасының Су ресурстары және ирригация вице-министрі Ерболат Ибрайханов Мақтаарал ауданына жұмыс сапарымен келіп, ИДЖЖ-2 кезеңі бойынша құрылыс жұмыстарын жүргізіп жатқан шетелдік компаниялардың өкілдерімен арнайы кездесу жиынын өткізді.
Жиынға аудан әкімі Б.Асанов, министрліктің су ресурстарын дамыту департаментінің бас сарапсшысы Е.Қалдыбеков, «Қазсушар» РМК Бас директорының өндіріс бойынша орынбасары И.Мырзаев, Ислам даму банкі жобаларын бағалау және мониторинг бойынша маманы Х.Ахмедов, «Қазсушар» РМК Түркістан филиалының директоры Қ.Бедебаев, бас инженері С.Тойтанов, аудан әкімінің орынбасары Н.Саттаров, ИДЖЖ-2 жоба жетекшісі А.Атантаев және құрылысты жүргізіп жатқан ирандық «Туннель Садд Ариана» компаниясының аймақтық директоры Х.Тахмасеби мен әзербайжандық «Акелик Групп» компаниясының директоры П.Грасмиктер қатысты.
«Ирригациялық дренаждық жүйелерді жетілдіру — 2» жобасы су ресурстарын тиімді пайдалану және ауыл шаруашылығындағы егістік жерлерді құнарландыру мақсатында жасалған бірегей жоба. Жоба Қазақстанның суармалы ауыл шаруашылығының дамуындағы өзекті мәселелерді шешуге бағытталған. Әсіресе, климаттық өзгерістер мен судың жетіспеушілігі жағдайында суармалы егіншіліктің дамуы үшін су шығынын азайту, дренаждық жүйелердің сапасын жақсарту өте маңызды екені белгілі.
2019 жылы құрылысы басталған жоба аясында қазіргі таңда Мақтаарал ауданында ұзындығы 643 шақырымды құрайтын каналдар мен ағын су арналары қалпына келтірілді. Сондай-ақ, тозығы жеткен 150 тік дренажды ұңғымалар қайта жөндеуден өтуде. Құны 42,1 миллиард теңгені құрайтын жобаның арқасында ауданымызда каналдардың пайдалы әсер коэффиценті 0,65-тен 0,90-ға дейін артады деп жоспарлануда. Дегенмен, жиында мердігерлер тарапынан орын алып жатқан кейбір кемшіліктер жөнінде айтылып, жобаны ертерек орындау үшін вице-министр тарапынан жауапты басшылар мен мердігерлерге тиісті тапсырмалар берілді.
Атап айтқанда, ИДЖЖ-2 кезеңі аясында А.Қалыбеков ауылдық округінде автомобиль жолының жағалауындағы «Земля и Труд» коллекторының апатты бөліктерін қалпына келтіру, бітпеген нысандар бойынша ақаулықтарды жою, тік дренажды ұңғымаларға автоматтандыру қондырғыларын біріңғай етіп орнату және электр желілерімен толық қамтамасыз ету мәселелері бойынша нақты тапсырмалар беріп, хаттамаға енгіздірді. Сондай-ақ, мердігер «Туннель Садд Ариана» компаниясына қараша айына дейін жұмыстарды толығымен аяқтап, нысандарды тапсыру жұмыстарына кірісу керектігін қадап айтты.
Айта кетейік, Мақтаарал ауданында ауыл шаруашылығының тұрақты дамуын қамтамасыз ету үшін ИДЖЖ-2 жобасының маңызы зор. Бұл жоба жергілікті халықтың әлеуметтік-экономикалық жағдайын жақсартуға, ауыл шаруашылығындағы өнімнің артуына және тиімді суару жүйелерінің енгізілуіне мүмкіндіктер береді.
