Құрметті аудан тұрғындары!
Баршаңызды ел тағдырында ерекше орын алатын мерейлі мереке – Қазақстан Республикасының Конституциясы күні және Конституциямыздың 30 жылдық мерейтойымен шын жүректен құттықтаймын!
30 тамыз – халқымыздың еркіндігі мен елдігінің, бірлігі мен болашағына деген сенімінің айқын көрінісі болған күн. Бұл – Тәуелсіз Қазақстанның құқықтық негізі қаланған тарихи белес, демократиялық даму жолындағы жаңа кезеңнің бастауы.
1995 жылы бүкілхалықтық референдум арқылы қабылданған Ата Заң – мемлекетіміздің берік іргетасы, ел бірлігінің, тыныштығы мен тұрақтылығының кепілі. Конституция – еліміздегі әрбір азаматтың бостандығын, құқықтары мен міндеттерін айқындап берген ең жоғарғы заң. Ол – біздің Тәуелсіздігімізді нығайтып, елдің саяси, экономикалық және әлеуметтік дамуына жол ашты.
Осы жылдар ішінде Ата Заңымызға сүйене отырып, мемлекетіміз үлкен биіктерді бағындырды. Қазақстан халықаралық аренада беделді елге айналып, экономикасы дамыған, саяси тұрақты мемлекет ретінде орнықты. Бұл – халқымыздың ауызбіршілігі мен еңбекқорлығының, дана басшыларымыздың көреген саясатының жемісі.
Ата Заңымызда белгіленген қағидалар – әділеттілік, заң үстемдігі, адам құқықтарын қорғау, азаматтық қоғам құру – бүгінде нақты істер арқылы жүзеге асырылып келеді. Президентіміз Қасым-Жомарт Кемелұлы Тоқаевтың бастамасымен жүргізіліп жатқан саяси реформалар да – осы Конституция негізінде еліміздің болашағын жарқын етуді көздеген батыл қадамдар.
Біздің ауданымыз – Мақтаарал өңірі де елімізбен бірге дамып, көркейіп келеді. Елдің өсіп-өркендеуіне өзіндік үлесін қосып отырған Мақтаарал жұрты – еңбекқор, бірлігі бекем, берекелі халық.
Бүгінгі таңда ауданда түрлі салалар бойынша іргелі жұмыстар атқарылып, әлеуметтік-экономикалық көрсеткіштер жақсарып келеді. Мұның бәрі – бірлігіміздің, Ата Заңымыздың арқасында мүмкін болып отырған жетістіктер.
Бүгінгі айтулы мереке – тек заңнамалық жүйенің мерекесі ғана емес, бұл – барша халқымыздың ортақ қуанышы, бірлігіміздің символы. Өйткені, Конституция – әрбір азаматтың құқықтарын қорғап, Отан алдындағы парызын айқындайтын құндылық.
Осы Конституция күні баршаңызға зор денсаулық, бақ-береке, амандық, отбасыңызға шаттық пен ырыс тілеймін.
Тәуелсіз еліміз жасай берсін, Ата Заңымыз әрдайым айбынымыз бен айбарымыз болсын!
Еліміз тыныш, жұртымыз аман, бірлігіміз бекем болғай!
Мерекелеріңіз құтты болсын!
Қазақстан Республикасының Конституциясы жасасын!
Ізгі ниетпен,
Мақтаарал ауданының әкімі
Асанов Бақыт Насырханұлы
