Мақтаарал ауданында тазалық пен экологиялық ахуалды жақсартуға бағытталған нақты қадамдар жасалуда. Бұл бастама Мемлекет басшысының тапсырмасымен жүзеге асырылып жатқан «Таза Қазақстан» республикалық бағдарламасы аясында қолға алынған. Аталған бағдарлама шеңберінде облыс әкімінің тапсырмасы бойынша облыстық бюджеттен 239,15 миллион теңге қаржы бөлініп, ауданның коммуналдық шаруашылық саласына қажетті жаңа техникалар сатып алынуда.
Атап айтқанда, бөлінген қаражатқа жалпы саны 11 дана трактор (оның ішінде қар, құм, шаң тазалайтындары бар), 11 тіркеме, 3 дана жүк тиегіш (погрузчик), 11 дана трицикл және 1 дана көтергіш техника (автогидроподъемник) алу жоспарланған. Бұл техникалар аудан аумағындағы санитарлық тазалықты жақсартуға, қатты тұрмыстық қалдықтарды жинау және шығару жұмысын жүйелеуге, сондай-ақ жалпы экологиялық мәдениетті арттыруға үлкен септігін тигізбек.
Бүгінгі таңда осы техникалардың алғашқы легі – 11 дана трактор, 11 тіркеме және 3 дана погрузчик ауданға жеткізіліп отыр. Аудан тұрғындары бұл қуанышты жаңалықты ерекше ықыласпен қабылдады. Техникалардың кілтін ресми түрде аудан әкімі Бақыт Асанов арнайы ұйымдастырылған салтанатты шара барысында жүргізушілерге табыс етті.
Өз сөзінде аудан басшысы жаңа техникалардың халық игілігіне қызмет ететінін атап өтіп, бұл жұмыстар елді мекендердің тазалығын жақсартуға үлкен үлес қосатынына сенім білдірді.
«Біз аудандағы тазалық пен тәртіпке айрықша көңіл бөліп келеміз. Бұл – тұрғындардың өмір сапасына тікелей әсер ететін маңызды мәселе. Мемлекет тарапынан көрсетілген қолдаудың арқасында бүгін осындай заманауи техникаларды алуға мүмкіндік туды. Бұл – біздің ортақ жетістігіміз. Енді осы техникаларды ұқыпты пайдаланып, олардың ұзақ уақыт қызмет етуін қамтамасыз етуіміз қажет», – деді, Бақыт Насырханұлы.
Айта кетейік, бұл бастама аудандағы коммуналдық қызмет сапасын жаңа деңгейге көтеріп, еңбек өнімділігін арттырады деп күтілуде. Сонымен қатар, тазалық сақтау мәдениетін қалыптастыруда жергілікті билік пен халықтың бірлескен іс-әрекеті үлкен рөл атқаратыны белгілі. Сондықтан, алдағы уақытта аудан әкімдігі тарапынан бұл бағыттағы жұмыстар жүйелі түрде жалғасын табатын болады.
