Қызылша — вирусты жұқпалы ауру, көбінесе балалар арасында тарайды. Ауру ауа-тамшы арқылы жұғады және тез таралуымен, асқыну қаупімен қауіпті саналады. Қызылша вирусы иммундық жүйені әлсіретіп, басқа инфекцияларға жол ашады.
Аурудың белгілері
Қызылшаның алғашқы белгілері тұмауға ұқсайды:
- Дене қызуының көтерілуі (39-40°C дейін),
- Құрғақ жөтел,
- Мұрыннан су ағу,
- Көздің қызаруы, жас ағу,
- Әлсіздік, тәбеттің төмендеуі.
2-3 күннен кейін науқастың ауыз қуысының шырышты қабатында ақшыл дақтар пайда болады (Коплик дақтары), ал 4-5 күнде бүкіл денеге қызыл бөртпе шығады.
Қызылшаның асқынулары
Ауру жеңіл өтуі де мүмкін, алайда кейбір жағдайларда ауыр асқынулар туындайды. Қызылшаның ең жиі кездесетін және қауіпті асқынуларына мыналар жатады:
- Отит (құлақ қабынуы),
- Пневмония (өкпенің қабынуы),
- Энцефалит (мидың қабынуы),
- Диарея, сусыздану,
- Көру қабілетінің нашарлауы немесе соқырлық,
- Иммундық жүйенің әлсіреуі.
Қызылша кімдер үшін аса қауіпті?
- 5 жасқа дейінгі балалар,
- Жүкті әйелдер,
- Егде жастағы адамдар,
- Иммунитеті әлсіз жандар (ВИЧ-пен өмір сүретіндер, қатерлі ісікпен ауыратындар).
Алдын алу жолдары
Қызылшадан қорғанудың ең тиімді жолы — вакцинация. Қызылшаға қарсы вакцина Қазақстанның ұлттық егу күнтізбесіне енгізілген және балаларға 1 және 6 жаста екі рет егіледі. Вакцина 95-98% жағдайда аурудан қорғайды.
Сондай-ақ:
- Қоғамдық орындарда жеке гигиена сақтау,
- Науқастармен байланысқа түспеу,
- Иммунитетті күшейту де маңызды.
Қорытынды
Қызылша – жеңіл-желпі қарайтын ауру емес. Уақтылы екпе алмаған жағдайда ауыр асқынуларға, кейде өлімге де алып келуі мүмкін. Сондықтан әрбір ата-ана өз баласының денсаулығы үшін жауапты екенін түсініп, екпе алуға мән беруі қажет. Денсаулық — ең қымбат байлық!
Түркістан облысының санитариялық-эпидемиологиялық бақылау департаментінің басшы орынбасары А.Еркінбекова
