Сайлауалды жұмысым аясында Жамбыл ауылдық округіне қарасты Абай елді мекенінің тұрғындарымен кездесу өткіздім. Бұл ауыл — ел мақтанышы, даңқты боксшы Мұхтархан Ділдәбековтің туған жері, рухы биік, жігері мықты жұрттың мекені. Абай ауылының аты аталса, елге еңбегімен танылған азаматтар еске түседі. Осындай тарихи ауылда болу – мен үшін мәртебе әрі үлкен жауапкершілік.
Кездесу жылы шырайлы, ашық диалог түрінде өтті. Ауыл азаматтары өздерінің туған жеріне деген жанашырлығын, оның болашағына бейжай қарамайтынын тағы да көрсетті. Сөзіміз – шынайы, ойымыз – нақты, мақсатымыз – ортақ болды. Мен өз бағдарламамды таныстырып қана қоймай, ауыл өмірінің тереңіне үңілуге мүмкіндік алдым. Тұрғындармен пікір алмаса отырып, ауылдың арман-мұраты мен бүгінгі тыныс-тіршілігін түсінуге тырыстым.
Әңгіме барысында тек мәселе емес, үміт пен сенім байқалды. Жастарға жағдай жасалса, елді мекенге жан бітірілсе, Абай ауылы бұрынғы даңқын арттыра түсеріне еш күмән жоқ. Осындай сенім – менің де басты тірегім. Бұл ауылдың батырлармен қатар еңбекқор ұстаздары, шаруа адамдары, үлкенді сыйлаған жастары бар – бұл үлкен байлық.
Мен өзімнің бағдарламалық жоспарларымды баяндай отырып, ауыл тұрғындарының ұсыныс-пікірлерін де мұқият тыңдадым. Айтылған әр ой – болашақта нақты іске асатын бастамаларға айналуы тиіс деп білемін. Кездесуден алған әсерім – тек жауапкершілік емес, шабыт. Шын мәнінде, ауылдың ертеңі үшін аянбай еңбек етуге ниетім бұрынғыдан да беки түсті.
13 шілде – таңдау күні. Бұл күн – ауылдың болашағы үшін маңызды шешім қабылданатын күн. Құрметті Абай ауылының тұрғындары, мен сіздердің сенімдеріңізді ақтауға, бұл ауылды жаңа деңгейге көтеруге бар күш-жігерімді жұмсаймын.
Абай ауылы – тек тарихы емес, болашағы да жарқын ауыл!
Сенім болса – серпіліс те болады!
Қолдауыңыз – жаңа бастамаларға жол ашады!
Ізгі ниетпен,
СЫДЫҚОВ Бақытжан Байшықұлы
Жамбыл ауылдық округінің әкіміне кандидат
