Мақтаарал ауданы сияқты су тапшылығы сезілетін аймақтарда тамшылатып суғару жүйесін енгізу өте маңызды. Мұндай әдіс жергілікті шаруаларға суды тек қажет мөлшерде пайдалануға мүмкіндік береді, бұл әсіресе су қорының шектеулі болған жағдайда үлкен пайда әкеледі. Сонымен қатар, тамшылатып суғару жүйесі егіннің өсуіне және дамуына оң әсерін тигізіп, өнімділікті арттыруға ықпал етеді. Бұл шаруалардың еңбек өнімділігін жақсартып, ауыл шаруашылығындағы экономикалық көрсеткіштерді оңтайландырады.
Өткен жылы ауданымызда 2 мың гектар алқапқа тамышлатып суғару технологиясы арқылы егін егіліп, мол өнімге қол жеткізілді. Атап айтқанда, мақта дақылының өнімділігі гектарына 60 центнерге жетіп, ауданның көрсеткішінен 2,2 есеге артық өнім алынды.
Облыс әкімінің тапсырмасымен биыл су үнемдеу технологиясына мемлекет тарапынан беріліп жатқан қолдаулар нәтижесінде 6 мың гектар алқапқа су үнемдеу технологияларын ендіру жоспарланып отыр. Қазірдің өзінде 89 шаруа қожалық тарапынан 4895 гектар алқап жаңа технологияны пайдалануға ниетті екені анықталды. Оның 904,9 гектары мемлекет тарапынан берілетін субсидия алуға құжаттарын өткізген. Сонымен қатар, жыл басынан бері 520 гектар бақша және қырыққабат дақылдарына су үнемдеу технологиясы енгізілген болса, бүгінде 118 гектар мақта дақылына және 35 гектар күріш дақылына жаңа технологияны енгізу жұмыстары басталды.
«Әрине, тамшылатып суғару технологиясын енгізу барысында белгілі бір қиындықтар мен шығындар болуы мүмкін. Мысалы, жүйенің бастапқы орнату құны жоғары болуы мүмкін, ал шаруалар жаңа технологияға бейімделу үшін арнайы білім мен дағдыларды қажет етеді. Сондықтан, мемлекет тамшылатып суғару технологиясын іске асырған шаруаларға кеткен шығынның 80%-ын субсидиялап беруді қолға алды. Сонымен қатар, жаңа технологиялы үйрету мақсатында семинарлар мен жиындарды жиі өткізіп, қажет болса тәжірибесі бар шаруалардан тәжірибе алмасуға көмектесеміз» — деді, ауданның кәсіпкерлік және ауыл шаруашылығы бөлімінің басшысы Баязит Әлімқұл.
Айта кетейік, ауданда 60 629 гектар суғармалы жер 8819 шаруа қожалықтарына тиесілі. Қазіргі таңда егістік алқаптардың сорлануы белең алғаны да жасырын емес. Мақтаадан алатын өнім көлемі де көңіл көншітпейді. Одан бөлек, оның бағасы кеткен шығынды ақтамай жатады. Сондықтан, жаңа технологияны шұғыл түрде аудан шаруалары қолға алып, мемлекеттің көмегін пайдаланғаны жөн. Ауыл шаруашылығына жауапты басшы тамшылатып суғару технологиясының пайдалы тұстары мен оған кететін шығын көлемдері туралы осылайша кеңінен атап өтті.
