1 маусым – Халықаралық балаларды қорғау күні мерекесіне орай Мақтаарал ауданының жұмыспен қамту және әлеуметтік бағдарламалар бөліміне қарасты Мырзакент өңірі бойынша мүгедектігі бар балаларға үйде арнаулы әлеуметтік қызмет көрсету бөлімшесінің ұйымдастыруымен мерекелік іс-шара өткізілді.
Мерекелік шара аясында бөлімше есебінде тұрған 92 ерекше күтімді қажет ететін бала мен олардың ата-аналарына арналған кең дастархан жайылып, жалпы саны 190 адам қамтылды. Сонымен қатар, балаларға арнайы сыйлықтар мен тәттілер табысталып, олардың мерекелік көңіл-күйін көтеруге ерекше көңіл бөлінді.
Іс-шараның басты мақсаты – ерекше күтімді қажет ететін балаларға қуаныш сыйлап, олардың қоғам өміріне белсенді араласуына қолдау көрсету, сондай-ақ ата-аналарға мерекелік көңіл-күй сыйлау болды.
Мерекелік шараны ұйымдастыруға бөлімшенің 20 әлеуметтік қызметкері мен бірқатар жомарт демеушілер белсенді атсалысты. Олардың қолдауының арқасында балалар үшін әсерлі әрі мазмұнды мереке ұйымдастырылып, қатысушылар көтеріңкі көңіл-күйге бөленді.
Іс-шараға Мақтаарал ауданы әкімінің орынбасары Серік Тұрсынқұлов және ауданның жұмыспен қамту және әлеуметтік бағдарламалар бөлімінің басшысы Нұрғали Елшібаев қатысып, балалар мен олардың ата-аналарын Халықаралық балаларды қорғау күнімен құттықтады.
Өз сөздерінде олар балаларға зор денсаулық, бақытты балалық шақ пен жарқын болашақ тілеп, мемлекет тарапынан ерекше қажеттілігі бар балаларды қолдау бағытындағы жұмыстардың алдағы уақытта да жалғасатынын атап өтті. Сонымен қатар, аудан басшылығы аталған қайырымдылық шарасына демеушілік көрсетіп, балаларға қуаныш сыйлаған азаматтарға арнайы Алғыс хаттар табыстап, олардың игі істеріне ризашылықтарын білдірді.
Мерекелік шара барысында балаларға арналған ойын-сауық бағдарламалары ұйымдастырылып, көтеріңкі көңіл-күй сыйлайтын түрлі іс-шаралар өткізілді. Бұл күн ерекше балалар мен олардың ата-аналары үшін есте қаларлық жарқын мерекеге айналды.
Айта кетейік, Мақтаарал ауданында ерекше қажеттілігі бар балаларды әлеуметтік қолдау, олардың өмір сапасын жақсарту және қоғамға бейімделуіне жағдай жасау бағытындағы жұмыстар алдағы уақытта да жүйелі түрде жалғасын табады.
