Наурыз — бұл тек көктемнің келгенін білдіретін мейрам ғана емес, ол ұлттың тарихынан, мәдениетінің байлығынан терең із қалдырған ерекше дәстүрлі мереке. Қазақ халқы үшін бұл күн – көне заманнан бері жаңару мен жаңа өмірдің бастамасы ретінде тойланатын ең ежелгі мерекелердің бірі.
Күні кеше аудан орталығы Мырзакент кентінде дүбірлі Наурыз тойы өтсе, сол той бүгін Атакент кентінде жалғасты. Іс-шараға аудан әкімі аппаратының басшысы Нұржан Атақұлов, аудандық қоғамдық кеңестің төрағасы Махамбет Ердешов және Атакент кентінің әкімі Сламхан Азимовтар қатысты.
Кенттің орталық саябағына жиналған халықтың қарасы көп. Ұлттық дәстүр мен өнерді қамтыған мазмұнды бағдарламар дайындалған. Күй күмбірлеп, бишілер би биледі. Киіз үйлер тігіліп, тұрғындарға дәм ұсынылды. Қолөнер шеберлері мен суретшілердің көрмесі ұйымдастырылып, келушілер қазақ халқының бай мәдениетімен танысты. Ұлттық тағамдар көрмесі арқылы салт-дәстүріміз дәріптелді. Ұлттық спорт түрлерінен жарыстар өтіп, Наурыз мейрамының айшықты дәстүрі жалғасын тапты.
«Наурыз тойы — қазақтың ұлттық мәдениетінде үлкен мәнге ие. Әсіресе, бұл мереке жаңа бастамалар мен үміттердің символы ретінде танылған. Бұл күні адамдар бір-біріне жақсы тілектер айтып, үй-іші мен аула тазарып, бұрынғы реніштер ұмытылып, жаңа достықтар мен жақсылықтар орнайды. Көптеген отбасылар өз үйлерін, аулаларын тазалап, жаңа киімдер киіп, мейрамға дайындалатын болған. Сондықтан, бүгінгідей керемет мейрам қарсаңында баршаларыңыздың отбасыларыңызға амандық, дендеріңізге саулық, елімізге тыныштық пен бейбітшілік тілеймін!» — деді, аппарат басшысы.
Айта кетейік, Наурыз мейрамына арналған іс-шаралар мен бағдарламалар кенттер мен ауылдық округтердің, елді мекендердің, мектептер мен балабақшалардың баршасында өткізілуде.
