Мақтаарал аудандық Мансап орталығы филиалының ұйымдастыруымен аудандық мәдениет үйінде пробация есебінде тұрған азаматтарды жұмыспен қамту мәселесі бойынша кең көлемде жиын өтті.
Іс-шараға аудан әкімінің орынбасары Серік Тұрсынқұлов, Түркістан облысының үкімдерін орындалуын қадағалау басқармасының бастығы Нарбек Мықтыбаев, облыстық жұмыспен қамтуды үйлестіру және әлеуметтік бағдарламалар басқармасы басшысының орынбасары Нұржан Нұрашов, аудан прокурорының орынбасары Дәурен Романов, аудандық Мансап орталығы филиалының директоры Оразбек Жетібаев, аудандық пробация бөлімі бастығының міндетін уақытша атқарушы Данияр Керімов және пробация есебінде тұрған азаматтар қатысты.
Күн тәртібінде Түркістан облысы пенитенциярлық жүйесіндегі проблемалардың толық шешілуін қамтамасыз ету мақсатында бірлескен жол картасының орындалуы бойынша мәселелер қаралды. Оның ішінде аудандық пробация есебінде тұрған азаматтарды жұмыспен қамту, әлеуметтік көмектер беру жұмыстары кеңінен талқыланды.
Түркістан облысы әкімдігінің 2024 жылғы 27 желтоқсан айында №274 қаулысына сәйкес, пробация қызметінің есебінде тұрған адамдарды жұмысқа орналастыру үшін Мақтаарал ауданында 5 мекемеге 13 адамды жұмыспен қамту қарастырылған болатын. Жыл басынан бері жұмыспен қамту мәселесі бойынша аудандық мансап орталығына пробация есебінде тұратын 21 азаматқа бағдарламаның бағыттары бойынша кеңес беріліп, олардың әлеуметтік жағдайы нақтыланды және бекітілген жоспарды орындау мақсатында пробация қызметінің есебінде тұрған азаматтарға арналған бос жұмыс орындарының және жұмыспен қамту шараларының басқа да түрлерімен таныстыру бойынша жәрмеңкелер өткізілген. Нәтижесінде қоғамдық жұмысқа 3 азамат, деректер қорындағы тұрақты бос жұмыс орындарына 3 азамат, «Мырзакент 2020» ЖШС-не 2 азамат квота бойынша жолданып, ал 5 азамат өз еркімен ұсынған жұмыстардан бас тартты. Сондай-ақ, «Бастау бизнес» жобасы бойынша 2 азамат кәсіпкерлік негіздеріне оқып, сертификат алды, ендігі өз кәсіптерін ашу бойынша грант алуға қатыса алады.
Жиынның қорытындысы бойынша жиынға қатысушы пробация есебінде тұрған әрбір азаматтың мәселесі жеке-жеке қаралып, олардың әлеуметтік жағдайын көтеру, жұмысқа орналастыру бойынша кеңестер берілді. Мәселен, әрбір азаматтың әлеуметтік санаты анықталып, жұмысқа орналастыру, «Бастау бизнес» бойынша грант алу, атаулы әлеуметтік көмек тағайындау, емханада ем алу, банкрот деп жариялау, лизингпен техника алу мәселелері қаралып, көмектер көрсетілетін болды.
