Мақтаарал ауданында Қазақстан Республикасы Конституциясының 30 жылдығына арналған «Тәуелсіздік тірегі – Ата Заң» атты салтанатты іс-шара жоғары деңгейде ұйымдастырылды.
Мемлекеттігіміздің тұғырын бекітіп, тәуелсіздігіміздің темірқазығына айналған Ата Заңның мерейлі мерекесіне мемлекеттік мекемелердің, құқық қорғау органдарының қызметкерлері, ардагерлер, жастар және жалпы аудан тұрғындары қатысты.
Шара шымылдығы салтанатты фанфармен ашылып, сахна төріне ҚР Конституциясының кітабы әкелініп қойылды. Осыдан кейін Қазақстан Республикасының Мемлекеттік Әнұраны орындалып, барша қонақтар туға қарап сап түзеді.
Салтанатты жиын барысында алғашқы сөз кезегі Мақтаарал ауданының әкімі Асанов Бақыт Насырханұлына берілді. Өз құттықтауында ол Конституцияның ел дамуындағы рөліне тоқталып, белсенді еңбегімен көзге түсіп жүрген мемлекеттік қызметшілерді, құқық қорғау органдары мен азаматтық қорғау органдарының қызметкерлерін облыс әкімінің және өзінің алғыс хаттарымен марапаттады. Сондай-ақ, өңір намысын қорғап, Түркістан облысының әуесқой командалары арасында өткен футбол чемпионатында жеңімпаз атанған Мақтаарал ауданының құрама командасын салтанатты түрде марапаттады.
Жерлестерін қуанышқа бөлеген спортшыларға арнайы медальдар табысталып, LED экран арқылы жеңісті сәттердің видеошолуы көрсетілді. Команда бас бапкері Назарбеков Бекжан Әмірәліұлы сахнаға шақырылып, алдағы ел кубогіне дайындық барысын баяндады.
Сахнада түрлі сала өкілдері – аудандық мәслихат төрағасы Сарсекбаев Қадір Тұранұлы, «AMANAT» партиясының аудандық филиалы төрағасы Сарсенов Мұхтар Кенжетайұлы, Қазақстан ардагерлер қоғамдық бірлестігінің төрағасы Базарбаев Ерғали Рузимович мерекелік құттықтауларын жеткізіп, бірнеше азаматтарға өздерінің марапттарын табыстады.
Мерекелік жиында патриоттық рухтағы әндер шырқалды. Іс-шара соңында жүргізуші елдік пен бірліктің, заңға адалдық пен жауапкершіліктің маңызын атап өтті.
Айта кетейік, Ата Заң – елдің тұғыры, халықтың жүрегі. Конституция күнінде өткен бұл шара – Тәуелсіз Қазақстанның келешекке деген сенімі мен ұрпаққа қалдырған өнегелі аманатының көрінісі болды.
