Наурыз мерекесінің маңызы тек табиғаттың жаңаруымен ғана емес, сонымен қатар халықтардың бірлігі мен ынтымақтастығын білдіретін ерекше құбылыс. Мақтаарал ауданындағы тәжік ұлтының өкілдері тұратын Фердауси және Хайдар ауылдарында өткен Наурыз тойы осыны айғақтайды. Мерекелік кеш тек дәстүрлерді жаңғыртып қана қоймай, ұлттар арасындағы достықты нығайтуға бағытталған маңызды шара болды.
Шығыс мәдениетінің қонақжайлығын, қанық дәстүрлерін көрсеткен бұл іс-шарада қазақ, тәжік, өзбек және басқа да ұлттардың өкілдері бір арнада тоғысып, бір-біріне деген құрмет пен ізеттілектерін білдірді. Ұлттар арасындағы достық пен бірлікті нығайту үшін ұйымдастырылған мерекеде әр халықтың өзіндік ерекшеліктері мен салт-дәстүрлері де көрініс тапты.
Мерекелік кеште өнерпаздар өздерінің дәстүрлі әндері мен билерін ұсынды. Әр өнер туындысы халықтардың тарихы мен мәдениетіне терең бойлап, олардың бірлігін паш етті. Сондай-ақ, іс-шарада спорт түрлерінен жарыстар өтіп, жеңімпаздар арнайы марапатталды.
«Наурыз — жаңа жылдың бастамасы ғана емес, бұл адамзаттың бір-біріне деген мейірімі мен махаббатын арттыратын кезең. Бір-біріне құрмет көрсетіп, ұлттар арасындағы достықты арттыру мақсатында өткізілген мереке бәріміз үшін тағлымға толы болды. Еліміздегі түрлі ұлттардың мәдениеті мен дәстүрлері бір-бірімен тығыз байланыста бола отырып, Қазақстанды бейбітшілік пен келісімнің алтын қазынасына айнала берсін!» — деді, аудан әкімінің орынбасары Серік Тұрсынқұлов.
Айта кетейік, наурыз мейрамында киіз үй тігіліп, қонақтар дастарханнан дәм татып, бір-бірлеріне молшылық пен ырыс тілесті. Мерекелік дастарханға нан, бауырсақ, түрлі ұлттық тағамдар қойылды. Әр ұлттың өзінің ұлттық тағамдарын ұсынуы, өз мәдениетін танытуы — ұлттар арасында ынтымақтастықтың одан әрі нығаюына септігін тигізді.
