Әрбір ұлт, халық немесе мәдениет өз ерекшеліктерімен маңызды және бірегей болып табылады. Түрлі халықтардың тарихы, мәдениеті мен дәстүрлері бір-біріне әсер етеді, бір-бірінен үйренуге мүмкіндіктер береді. Бұл көпмәдениеттілік әртүрлі халықтар арасында сенім мен түсіністікті, бейбітшілікті нығайтуға септігін тигізеді.
Табиғаттың қайта оянып, күн мен түннің теңеліп, жаңа өмірдің басталуы мен көктемнің келуін білдіретін Наурыз мерекесі Мақтаарал ауданында әлі де жалғасын табуда. Күні кеше Мақтаарал ауылдық округіне қарасты тәжік ағайындар көп тұратын Қазақ КСР-нің қырық жылдығы ауылында өткен іс-шараға аудан әкімі Бақыт Асанов қатысып, көпұлтты қоғамымыздағы бірлік пен ынтымақтың нығая беруіне тілектестік білдірді. Сондай-ақ, ауданымыздағы барша этнос өкілдерін мерекемен құттықтады.
«Әрбір этникалық топ өз мәдениетін сақтай отырып, ортақ мақсатқа — еліміздің гүлденуіне — қызмет етеді. Біз тек өзара құрмет, түсіністік пен ынтымақтастық арқылы ғана әлемді бейбіт әрі гүлденген етуге қол жеткізе аламыз. Әрбір адам, ұлт немесе мәдениет әлемдік қауымдастықтың бір бөлігі болып табылады, сондықтан біз бәріміз бір-бірімізді құрметтеп, бірлесіп өмір сүріп, болашаққа сеніммен қадам басуымыз қажет. Халықтар достығы — бүкіл әлемде адамзаттың дамуы мен бірлігін қамтамасыз ететін негізгі күш» — деді, Бақыт Насырханұлы.
Ауылдағы Ә.Навои жалпы орта мектебінде өткен іс-шарада ұлттық дәстүрлер мен өнерді қамтыған мазмұнды бағдарламар көрсетілді. Күй күмбірлеп, бишілер би биледі. Қолөнер шеберлері мен суретшілердің көрмесі ұйымдастырылып, келушілер қазақ халқының бай мәдениетімен танысты. Ұлттық спорт түрлерінен жарыстар өтіп, Наурыз мейрамының айшықты дәстүрі жалғасын тапты.
Айта кетейік, Мақтаарал ауданында тәжік, өзбек, орыс, кәріс және әзербайжан этно-мәдени орталықтары жұмыс істейді.
