Наурыз мейрамы — көктемнің алғашқы күні, жаңа жылдың басы, ұлтымыздың дәстүрлері мен мәдениетін ерекше сақтаған мереке. Бұл мейрам көне заманнан бері көптеген халықтар үшін маңызды болып келген. Қазақ халқы Наурызды жыл басы ретінде тойлап, оны жаңарудың, тазарудың және қайта туудың символы деп санайды.
21 наурыз – Ұлыстың ұлы күні қарсаңында Мақтаарал аудандық орталық кітапханасының алаңында «Нұр себеле, Ұлыстың ұлы күні» атты мерекелік іс-шара өтті.
Көктемгі жаңарудың белгісін көрсететін, ұлт пен ұлыстың сағынып күтетін ортақ мерекесі әз-Наурызды атап өту — бұл ең алдымен табиғаттың жаңаруы мен тіршіліктің қайта оянуын тойлау. Іс-шараға аудан әкімі Бақыт Асанов қатысып, кеш қонақтарын мерекемен құттықтап, ізгі тілегін жолдады.
«Наурыз — бұл жер бетіндегі барлық тіршілік иелері үшін жаңа өмірдің бастауы. Қазақ халқында Наурызды тойлау кезінде табиғатқа, жан-жануарларға, адамдарға деген ізгі ниет, махаббат пен құрмет ерекше орын алады. Мереке алдындағы дайындық та үлкен мәнге ие. Қала мен ауылда тұрғындар үйлерін таза ұстап, ағаштарын отырғызып, аулаларын гүлдендіреді. Үйдің ішін де тазалап, есіктерді, терезелерді жуып, жаңа жылға дайындалады. Бұл тек физикалық тазалық емес, жан дүниенің, ой-сананың тазалануын білдіреді. Әрбір іс-әрекет символикалық мәнге ие» — деді, Бақыт Насырханұлы.
Іс-шара барысында қазақтың ұлттық салт-дәстүрлерінен, ұлттық спорт түрлерінен көріністер көрсетіліп, мың бұралған бишілер, әсем әуезді әншілер өз өнерлерін көрсетті. Сонымен қатар, кештің басты қонағы — тіл жанашыры, қоғам қайраткері Оразкүл Асанғазықызы да мерекелік кешке қатысып, мақтааралдықтарды мерекемен құттықтап, отбасылық құндылықтар, ұлттық тәрбие мен қоғамдағы береке-бірлікті нығайту туралы сөз қозғады.
Шара соңында мерекелік кешке белсене қатысқан оқырмандар мен қонақтар марапатталып, бағалы сыйлықтар таратылды.
Айта кетейік, аудан көлемінде Наурыз мейрамы 20-наурыз күні Мырзакент кентінің орталық алаңында тойланатын болады.
