Сайлауалды үгіт-насихат жұмыстарым аясында Жамбыл ауылдық округіне қарасты Тегістік елді мекенінің тұрғындарымен кездестім. Бұл кездесу мен үшін аса маңызды әрі мазмұнды өтті.
Тегістік ауылы – округіміздің еңбекқор, берекелі ауылдарының бірі. Халқы ашық-жарқын, ауыл мәселесіне бейжай қарамайтын, болашағына алаңдайтын азаматтар екені баршаңызға белгілі.
Жиын барысында қоғамдық қауіпсіздік, жастардың бос уақытын тиімді ұйымдастыру, ауыл шаруашылығына және кәсіпкерлікке жеңілдетілген несиелендіру, мектептің материалдық-техникалық базасын нығайту мәселелері көтерілді. Мен сайлауалды бағдарламамда айтылған бұл мәселелердің баршасы қамтылғанын атап өтіп, үгіт-насихат жұмыстарымды жүргіздім.
Тегістік ауылының тұрғындары өздерінің пікірлерін, ұсыныс-тілектерін еркін жеткізді. Мен үшін әрбір айтылған ой — болашақта жүзеге асырылуы тиіс нақты міндет деп білемін. Бұл кездесулер бағдарламамды нақтылауға, оны ауыл өмірінің шынайы жағдайына икемдеуге үлкен көмек.
Сіздердің сенімдеріңіз – менің жауапкершілігімді арттырып отыр. Алдағы 13 шілде күні өтетін сайлауда менің бағдарламама қолдау білдіріп, ауылымыздың жарқын болашағына бірге жол ашамыз деп сенемін.
ТЕГІСТІК – ТІРЕГІ МЫҚТЫ АУЫЛ!
БІЗ БІРГЕ ӨСЕМІЗ, БІРГЕ ӨРКЕНДЕЙМІЗ!
Ізгі ниетпен,
СЫДЫҚОВ Бақытжан Байшықұлы
Жамбыл ауылдық округінің әкіміне кандидат
